Maretha Maartens woon in Bloemfontein. Reeds op 13 het sy stories en bydraes vir Klein Volksblad en die kerklike kindertydskrif Môrelig begin skryf en illustreer. In 1964, gedurende haar eerste jaar as BA Tale-student aan die destydse Universiteit van die Oranje-Vrystaat, is ’n seleksie van dié stories, blokkiesraaisels, strookprente ens deur die NG Sendingpers as Die Lekkerlees Kinderboek gepubliseer. Sedertdien het daar ongeveer 155 boeke uit haar pen – of die een verganklike rekenaar na die ander – verskyn.
